गोन्द्राङको टोलबुथ अब लोथरमा

नवयुग संवाददाता
१२ असार २०७७, शुक्रबार १५:३०

चितवन । पूर्व पश्चिम राजमार्गअन्तर्गत भरतपुर–हेटाँैडा सडकखण्डको सडक दस्तुर सङ्कलन गर्ने गोन्द्राङको टोलबुथलाई लोथरमा स्थानान्तरण गरिने भएको छ । सडक बोर्डको यही असार ४ गते बसेको कार्यकारी समितिको बैठकले सो निर्णय गरेको हो ।

बोर्डका कार्यकारी निर्देशक कृष्णसिंह बस्नेतले मनोहरि गाउँपालिका–६ लोथरमा टोलबुथ स्थानान्तरण गरिने जानकारी दिनुभयो । चालू आवमा सो ठाउँमा कर सङ्कलनका लागि वार्षिक रु १५ करोड आउने गरी ठेक्का लगाइएको थियो । यसअघि मूल्य वृद्धि नहुँदा रु ६ करोड ५१ लाखमा ठेक्का लगाइएकामा दोब्बरभन्दा बढी मूल्य बढाएसँगै राजश्व सङ्कलन बढेको उहाँले जानकारी दिनुभयो । त्यसअघि वार्षिक रु चार करोड ५२ लाखमा ठेक्का लगाइएको थियो । उहाँले भन्नुभयो, “ वार्षिक रु दुई करोड ५५ लाखमा लागेको ठेक्का गत वर्षसम्ममा आइपुग्दा रु १५ करोड पुगेको थियो ।”

सङ्कलित राजश्व सोही सडक मर्मतसम्भारमा खर्च हुने छ । उहाँका अनुसार गृहमन्त्रालय, सम्बन्धित स्थानीय तह र जिल्ला प्रशासन कार्यालय चितवनद्वारा अनुरोध गरिएपछि सीमा क्षेत्रमा टोलबुथ सार्न लागिएको हो । यसबाट मुख्यरुपमा पूर्वी चितवनका बासिन्दा प्रभावित हुँदै आएका थिए । आफ्नै जिल्लाको सदरमुकाम आवतजावत गर्दासमेत राजश्व तिर्नुपर्ने भएपछि उनीहरु मर्कामा परेको भन्दै प्रमुख राजनैतिक दलका जिल्ला नेतृत्व र जनप्रतिनिधिहरुले बुथ सार्न दबाब दिँदै आएका थिए । गत वर्षको असार ३ गते बुथमा स्थानीयवासीले आगो लगाएपछि त्यहाँ सुरक्षामा खटिएका प्रहरी घाइते भएका थिए ।

१५ पुलको काम शुरु

नारायणगढ–मुग्लिन सडकखण्डका १५ वटा पुलको निर्माणको प्रक्रिया अघि बढेको छ । बोलपत्र आह्वान भई सम्झौतासमेत भइसकेको छ । सडक विभागको पुल महाशाखा प्रमुख दीपक भट्टराईका अनुसार अनक कन्स्ट्रक्शनलाई ३३ महिनामा काम सम्पन्न गर्ने गरी सम्झौता गरिएको छ । सो कम्पनीले पुलको डिजाइन र निर्माण गर्नेछ । यसका लागि रु एक अर्ब २७ करोड पाँच लाखमा सम्झौता भएको उहाँले जानकारी दिनुभयो ।

सम्झौतासँगै सो कम्पनीले सर्भेको काम थालेको छ । उहाँका अनुसार डिजाइनका लागि नौ महिनाको समय दिइएको छ । महाशाखाले डिजाइनलाई अनुमोदन गरेपछि पुल निर्माणको काम अघि बढ्नेछ । सो सडकको मुग्लिनबाट नारायणगढतर्फ आउँदाका तीन पुल खहरे खोला, चिसेन्जी र तुइन खोलाको चौडाइ नौ मिटर रहनेछ भने अन्य सबै पुलको ११ मिटर हुने उहाँले जानकारी दिनुभयो । ती तीन पुल अफ्ठ्यारो ठाउँमा भएकाले चौडाइ कम भएको हो ।

पुलमा दोहोरो सवारीसाधन गुडेर छेउछेउमा फुटपाथ हुनेछ । लकडाउनका कारण तीव्र गतिमा काम गर्न नपाएको भए पनि ठेकेदार कम्पनीले आन्तरिक तयारी गरिरहेको छ । ती पुल विश्व बैंकको आर्थिक सहयोग प्राप्त हुने गरी निर्माण गर्न लागिएको हो । विश्व बैंकको प्रोग्राम फर रिजल्ट परियोजनाअन्तर्गत पुल निर्माण सम्पन्न भएपछि मूल्याङ्कन (भेरिफिकेशन) गरेरमात्र ऋण रकम भुक्तानी दिने गरी पुल बनाउन लागिएको उहाँले जानकारी दिनुभयो ।

यसअघि सो सडकखण्डका चारवटा पुल निर्माण थालिएकामा तीनवटा सम्पन्न भएको छ भने एउटा निर्माणाधीन रहेको छ । सो सडक आयोजनाका सूचना अधिकारी इन्जिनीयर शिव खनालका अनुसार बन्दै गरेको जलबिरेको पुलको ७४ प्रतिशत काम सम्पन्न भएको छ । लकडाउनसँगै कामदार नभएकाले काम प्रभावित भएको उहाँले जानकारी दिनुभयो ।

सो सडकखण्ड विस्तार गरी नौ मिटरदेखि ११ मिटरसम्म फराकिलो बनाइएको छ । यद्यपि पुल भने पाँचदेखि छ मिटर फराकिलो रहेका छन् । सडक फराकिलो र पुल साँघुरोसँगै जीर्ण हुँदा समस्या हुँदै आएको छ । समयमा काम भएमा अबको ३३ महिनापछि सो सडकका सबै पुल फराकिला र मजबुत हुनेछन् । यो सडक विस्तारसँगै पहिरो खस्न रोक्ने काम अन्तिम चरणमा पुगेको छ । चार किलो बाहेकका ठाउँमा पहिरो खस्न रोक्ने काम पनि सम्पन्न भएको खनालले जानकारी दिनुभयो ।

यसै सडक हुँदै राजधानी प्रवेश र बाहिरिने गरिन्छ । यो सडकमा दैनिक १० हजार हाराहारी सवारीसाधन गुड्ने गर्दछन् । रासस

यसमा तपाइको मत

Your email address will not be published. Required fields are marked *


*