महिलाहरूको क्षमता अभिवृद्धिको निम्ति १५ दिने उद्घोषण, भाषणकला तालिम सम्पन्न

मकवानपुर । विकासका लागि सहकार्य नेपाल संस्थाले सामाजिक विकास कार्यालय हेटौंडा ८ को सहकार्यमा सन्चालन गरेको उद्घोषण, भाषणकला, माइन्युट तथा प्रस्तावना लेखन सम्बन्धि १५ दिने तालिम सम्पन्न भएको छ । बैशाख १४ गतेबाट सन्चालन भएको तालिमको मंगलबार एक कार्यक्रमकाबीच समापन गरिएको हो । तालिममा ३५ जना महिलाको सहभागिता रहेको थियो । विकासका लागि सहकार्य नेपालका अध्यक्ष आनन्दराम पराजुलीको अध्यक्षतामा भएको समापन कार्यक्रममा हेटौंडा उपमहानगरपालिकाका मेयर मीनाकुमारी लामाको प्रमुख आतिथ्यता रहेको थियो । मेयर लामाले तालिममा सिकेका ज्ञानलाई व्यवहारम उतार्न आग्रह गरिन् । पछिल्लो समय धेरै तालिमहरु केवल तालिमको लागि मात्र हुने गरेको भन्दै उनले यस्ता तालिम महिलाका लागि प्रभावकारी हुने बिस्वास व्यक्त गरिन् ।

उनले आगामी दिनमा विकासका लागि सहकार्य नेपाल संस्थासँग सहकार्य गर्न तयार रहेको बताइन् । कार्यक्रममा हेटौंडा उपमहानगरपालिका २ नम्बर वडा अध्यक्ष विष्णुगोपाल महर्जन, दिव्यतारा बहुउद्देश्यीय सहकारी संस्थाका सचिव ईश्वर पण्डित, प्रमुख प्रशिक्षक आशिष दुलाल, सहभागी कुसुम बोगटी, रेखा रिजाल, स्वतिका माझी, तुलसा नौपाने र नन्दनी जैसवाल, संस्थाका सचिव गणेशदर्पण अधिकारीलगायतले मन्तव्य व्यक्त गरेका थिए । १५ दिनको तालिममा आशिष दुलाल, गणेशदर्पण अधिकारी र दीपज्योति थापाले सहजीकरण गरेका थिए । तालिमका सहभागीले उद्घोषण र भाषणकलासँगै माइन्युट र प्रस्तावना लेखन सम्बन्धि ज्ञान हाँसिल गर्न पाएको भन्दै खुसी व्यक्त गरे । तालिमको समापनमा विकासका लागि सहकार्य नेपालका कोषाध्यक्ष ईश्वरी शिल्पाकार लगायतको आतिथ्यता रहेको थियो ।