नक्कली लाइसेन्स प्रकरण: पोखराका कर्मचारीविरुद्ध विशेष अदालतमा मुद्दा

काठमाडौं । अख्तियार दुरुपयोग अनुसन्धान आयोग ले नक्कली सवारी चालक अनुमतिपत्र (लाइसेन्स) वितरण गरी अनियमितता गरेको अभियोगमा यातायात व्यवस्था कार्यालय पोखरा का तत्कालीन कर्मचारीविरुद्ध विशेष अदालत मा मुद्दा दायर गरेको छ।

अख्तियारका अनुसार कास्कीस्थित कार्यालयका तत्कालीन प्रशासन अधिकृत शंकर थापा र कम्प्युटर अपरेटर जगत ढकाल ले सेवाग्राही हिम बहादुर बस्नेत थापा सँग मिलेमतो गरी सरकारी अभिलेखमा हेरफेर गरेका थिए। उनीहरूले कहिल्यै जारी नभएको पुरानो लाइसेन्स नम्बरलाई आधार बनाएर विद्युतीय अभिलेखमा गैरकानुनी रूपमा विवरण थपघट गरेको पुष्टि भएको छ।

अनुसन्धानका क्रममा बस्नेतको नाममा ए र बी वर्गको लाइसेन्स २० वर्षअघि नै जारी भएको देखाउन २०५८ चैत २७ गतेको जारी मिति र २०७८ चैत २२ गतेको म्याद सकिने मिति राखेर झुट्टा विवरण प्रविष्ट गरिएको भेटिएको छ। सोही गलत अभिलेखका आधारमा २०७८ चैत १५ गते लाइसेन्सको प्रतिलिपि समेत जारी गरिएको थियो।

सरकारी कागजात तथा विद्युतीय अभिलेख सच्याएर भ्रष्टाचार गरेको ठहर गर्दै अख्तियारले थापा, ढकाल र बस्नेतलाई प्रतिवादी बनाउँदै सजायको मागदाबीसहित शुक्रबार विशेष अदालतमा आरोपपत्र दायर गरेको हो। यस्तो कार्यले सरकारी गोप्य विवरणमा अनधिकृत पहुँच पु¥याई व्यक्तिगत लाभ लिने प्रवृत्तिलाई प्रोत्साहन गर्ने र सुशासनमाथि गम्भीर असर पार्ने अख्तियारको ठहर छ।