लेबनानमा इजरायली आक्रमणबाट उच्च अधिकारीसहित १२ जनाले गुमाय ज्यान

काठमाण्डौं । दक्षिण लेबनानमा इजरायलले गरेको पछिल्लो आक्रमणमा लेबनानी सेनाका उच्च अधिकारीसहित कम्तीमा १२ जनाको ज्यान गएको छ ।

अमेरिकाको मध्यस्थतामा दुई देशबीच सशर्त युद्धविरामको सहमति भएको केही दिनमै इजरायलबाट ठूलो आक्रमण भएको हो । लेबनानको स्वास्थ्य मन्त्रालयले विज्ञप्तिमार्फत इजरायली आक्रमण खर्दाली–नबातीएह क्षेत्रलाई लक्षित गरी भएको जनाएको छ । सुरक्षाकर्मी चढेको एउटा गाडीमा भएको आक्रमणमा सेनाका उच्च अधिकारीले पनि ज्यान गुमाएका अलजजिराले जनाएको छ ।

इजरायली सेनाले यो आक्रमण ‘सक्रिय युद्ध क्षेत्र’मा भएको दाबी गरेको छ । यो क्षेत्रमा आवतजावतका लागि इजरायली सेनासँग समन्वय आवश्यक पर्ने उसको भनाइ छ । लेबनानका राष्ट्रपति जोसेफले आक्रमणको निन्दा गर्नुभएको छ ।