बर्डफ्लुको सङ्क्रमण नियन्त्रणतर्फ : किसानलाई जैविक सुरक्षा अपनाउन आग्रह

काठमाण्डौं । देशका विभिन्न ११ जिल्लामा देखिएको बर्डफ्लुको सङ्क्रमण नियन्त्रण उन्मुख भएको छ । गएको साउन १ गते यता बर्डफ्लुको सङ्क्रमण देखिएको छैन । सङ्क्रमण रोकथाम र नियन्त्रणका लागि सचेतनासँगै आवश्यक सावधानी अपनाएका कारण सङ्क्रमण थप बढ्न नपाएको नेपाल लेयर्स कुखुरापालक सङ्घका अध्यक्ष विनोद पोखरेलले बताउनुभयो ।

नेपाल ह्याचरी उद्योग सङ्घका केन्द्रीय अध्यक्ष राजेन्द्र लामिछानेले पनि रोग नियन्त्रण उन्मुख रहेको र यसअघि प्रभावित किसानलाई सरकारले आवश्यक सहयोग गर्नेमा आफूहरू विश्वस्त रहेको बताउनुभयो ।

नेपालको पोल्ट्री व्यवसाय क्षेत्रमा झण्डै १६० अर्ब लगानी रहेको भन्दै उहाँले यसको संरक्षण राज्यतर्फबाट हुनुपर्नेमा जोड दिनुभयो । पशु सेवा विभागका महानिर्देशक डा। उमेश दाहालले जैविक सुरक्षाका विधि र निरन्तर अनुगमन गर्न किसानलाई आग्रह गर्नुभएको छ ।

उहाँका अनुसार बितेका चार महिनामा आठ लाख ३५ हजार ५६३ वटा पन्छी नष्ट गरिएको छ । ११ लाख ६५ हजार ६६३ अण्डा, दुई लाख ४५ हजार ३५ किलो दाना नष्ट गरिएको छ । काठमाण्डौ उपत्यकाभित्र र काभ्रेमा मात्रै तीन लाख ६७ हजार ८३५ पन्छी नष्ट गरिएको विभागको तथ्याङ्क छ ।

महानिर्देशक दाहालका अनुसार प्रभावित किसानलाई तत्काल सरकारले राहत उपलब्ध गराएको छ । राहतका लागि ५२ करोड रुपैयाँ व्यवस्थापन भएकोमा अहिलेसम्म १०४ जना किसान र फार्मको खातामा ५० करोड ७१ लाख १५ हजार ७०४ रुपैयाँ रकम निकासा गरिसकिएको छ ।

बर्डफ्लुको सङ्क्रमण घटेसँगै कुखुराको अण्डा र मासुको खपत बढ्न थालेको छ ।