इरानी आक्रमणमा १२ अमेरिकी सैनिक घाइते

रियाद । साउदी अरबस्थित प्रिन्स सुल्तान एयरबेसमा इरानले गरेको सैन्य आक्रमणमा परी १२ जना अमेरिकी सैनिक घाइते भएका छन्। एक अमेरिकी अधिकारीले रोयटर्सलाई दिएको जानकारी अनुसार घाइतेमध्ये दुई जनाको अवस्था गम्भीर छ।

फेब्रुअरी २८ देखि इरानविरुद्ध सुरु भएको युद्धमा अमेरिकी सेनामाथि भएको यो पछिल्लो ठूलो प्रहार हो। यससँगै युद्ध सुरु भएदेखि अहिलेसम्म घाइते हुने अमेरिकी सैन्य सेवाका सदस्यहरूको संख्या ३०० नाघेको छ।

अमेरिकी सेनाले शुक्रबार सार्वजनिक गरेको तथ्यांक अनुसार घाइतेमध्ये २७३ जना उपचारपछि निको भएर पुनः आफ्नो ड्युटीमा फर्किसकेका छन्। यद्यपि यो द्वन्द्वमा परेर हालसम्म १३ जना अमेरिकी सैनिकले ज्यान गुमाइसकेका छन्।

पछिल्लो समय खाडी क्षेत्रमा ड्रोन र क्षेप्यास्त्र प्रहारका घटना तीव्र बनेका छन्। इरानले अमेरिकी र इजरायली सैन्य अड्डालाई निशाना बनाउन थालेपछि क्षेत्रमा तनाव झनै चुलिएको छ।