एनसेलका सीईओले छाडे नेपाल, डिल्लीराम श्रेष्ठलाई अन्तरिम जिम्मेवारी

काठमाडौं । नेपालमा विदेशी लगानीको वातावरण नरहेको र काम गर्न सक्ने अवस्था पनि नरहेको भन्दै एनसेलका सीइओ माइकल फोले राजीनामा दिएर स्वदेश फर्किएका छन् ।

फोलेको राजीनामापछि एनसेल सञ्चालक समितिले प्रमुख कर्पोरेट तथा नियामकीय मामिला अधिकृत डिल्लीराम श्रेष्ठलाई अन्तरिम सिइओको जिम्मेवारी दिएको छ । यसको जानकारी नियामक निकाय नेपाल दूरसञ्चार प्राधिकरणलाई गराइएको छ ।

स्मार्टसेलको सम्पत्ति लिलामी प्रकरणमा सरकारले सीआइबी लगाएर धितो लिलामी गर्ने बैंक र लिलामी सकार्ने सेवा प्रदायकलगायतलाई मुद्दा चलाउन लागेपछि सीईओ फोले नेपालमा काम गर्न नसकिने भन्दै एक वर्ष नपुग्दै बाहिरिएका हुन् ।

सरकारले टंकमणि शर्मा प्रतिवेदन सार्वजनिक गरेर कम्पनीको गोपनीय अधिकार हनन गरेको भन्दै एनसेल सर्वोच्चमा गएको थियो । सर्वोच्चले एनसेलको पक्षमा अन्तरिम आदेश पनि दिएको छ ।

तर, नेपालमा विदेशी लगानीकर्तामाथि सरकारबाटै ज्यादति भएको गुनासो एनसेलले यसअघि अर्थमन्त्रीले विदेशी लगानकर्तासँग आयोजना गरेको छलफलमा पनि सुनाएको थियो ।