एनपीएलमा विदेशी स्टारबिनै उपाधि रक्षा गर्ने दाउमा लुम्बिनी

काठमाडौँ । नेपाल प्रिमियर लिग (एनपीएल)को तेस्रो संस्करणमा साविक विजेता लुम्बिनी लायन्स उपाधि रक्षाको अभियानमा छ । टोलीले अहिलेसम्मको यात्रामा हारको सामना गर्नुपरेको छैन ।

अन्य फ्रेन्चाइज टोलीले विश्व क्रिकेटमा चर्चित विदेशी खेलाडी भित्र्याएर आफ्नो शक्ति देखाउन खोज्दा लुम्बिनी भने टिमको सन्तुलन, नेपाली खेलाडीको प्रदर्शन र कप्तान रोहित पौडेलको नेतृत्वका कारण बलियो देखिएको छ । एनपीएल सुरू हुनुअघि चर्चित विदेशी खेलाडी ल्याउन उदासिनता देखाएको भनेर लुम्बिनी लायन्सका फ्यानहरू असन्तुष्ट थिए ।

एनपीएलमा काठमाडौं गोर्खाजसँग डेभिड वार्नर, पोखरा एभेन्जर्ससँग शाकिब अल हसन, जनकपुर बोल्ट्ससँग मोइन अली र जेम्स निसम तथा विराटनगर किंग्ससँग आन्द्रे रसेलजस्ता चर्चित विदेशी खेलाडी छन् । तर, लुम्बिनीले यस्ता ठूला नामको आकर्षणभन्दा मैदानमा नतिजा निकाल्ने क्षमतालाई प्राथमिकता दिएको देखिन्छ ।

लुम्बिनीको विदेशी खेलाडी समूहमा अस्ट्रेलियाका डार्सी सर्ट, श्रीलंकाका निरोशन डिकवेला, नामिबियाका रुबेन ट्रम्पलम्यान, बंगलादेशका शमिम हुसेन र अमेरिकाका शाड्ली भान साल्कविक छन् । उनीहरू विश्व क्रिकेटका अत्यधिक चर्चित नाम नभए पनि टोलीको आवश्यकताअनुसार भूमिका निर्वाह गर्न सक्ने खेलाडी हुन् ।

लुम्बिनीले अहिलेसम्म उत्कृष्ट प्रदर्शनसहित अपराजित यात्रा गरिरहेको छ । पहिलो खेलमा सुदूरपश्चिम रोयल्सलाई सात विकेटले पराजित गरेको थियो । त्यसपछि चितवन राइनोजसँगको खेल वर्षाका कारण रद्द भएर अंक बाँड्नुपर्यो । पोखरा एभेन्जर्सलाई आठ विकेटले हराएको लुम्बिनीले जनकपुर बोल्ट्सविरुद्ध १६ रनको जित निकाल्यो । लुम्बिनी चार खेलबाट तीन जित र एक अनिर्णीत नतिजासहित सात अंक जोडेर अंकतालिकाको शीर्ष स्थानमा छ ।

लुम्बिनीको सफलतामा कप्तान रोहित पौडेलको भूमिका महत्त्वपूर्ण छ । नेपाली राष्ट्रिय टोलीको नेतृत्व गरिसकेका रोहितले ब्याटिङबाट योगदान दिनुका साथै खेलको परिस्थितिअनुसार टोलीलाई अघि बढाउने जिम्मेवारी सम्हालिरहेका छन् ।

पोखराविरुद्ध उनले अविजित ४७ रन बनाएका थिए । जनकपुरविरुद्ध पनि उनले ३८ रन जोडे । यी दुई इनिङ्सले कप्तानले महत्त्वपूर्ण समयमा ब्याटिङको जिम्मेवारी लिन सक्ने देखाएका छन् ।

लुम्बिनीको अर्को बलियो पक्ष नेपाली खेलाडीको सामूहिक योगदान हो । शेर मल्ल र तिलक भण्डारीले स्पिन बलिङमा प्रभाव देखाएका छन् भने आसिफ शेखले ब्याटिङलाई मजबुत बनाएका छन् । सन्दीप जोरा, किशोर महतो, दिलिप नाथ र अन्य नेपाली खेलाडीबाट पनि टोलीले योगदानको अपेक्षा गरेको छ ।

लुम्बिनीले गत संस्करणको उपाधि जित्दा पनि नेपाली खेलाडीको भूमिका महत्त्वपूर्ण थियो । पहिलो संस्करणमा अंकतालिकाको पुछारमा रहेको टोलीले दोस्रो संस्करणमा उपाधि जितेर आफूलाई बदल्न सक्ने क्षमता प्रमाणित गर्यो । अहिले त्यही सफलताको जगमा तेस्रो संस्करणमा उपाधि जोगाउने चुनौती सामना गरिरहेको छ ।

एनपीएलमा विदेशी खेलाडीको चर्चा हुनु स्वाभाविक हो । चर्चित खेलाडीको आगमनले प्रतियोगिताको आकर्षण बढाउँछ र समर्थकको ध्यान तान्छ । तर, टी–२० क्रिकेटमा नाम चलेका खेलाडीको उपस्थितिले मात्र जित सुनिश्चित गर्दैन ।

लुम्बिनीले रोजेका विदेशी खेलाडीलाई हेर्दा टोलीले फरक भूमिका पूरा गर्ने खेलाडीको संयोजन बनाएको देखिन्छ । डार्सी सर्टले ओपनिङ र स्पिन बलिङमा योगदान दिन सक्छन् । डिकवेलाले विकेटकिपिङसँगै ब्याटिङ सम्हाल्छन् । ट्रम्पलम्यानले तीव्र बलिङको जिम्मेवारी लिन्छन् । शमिम हुसेन र शाड्ली भान साल्कविकले अलराउन्ड विकल्प उपलब्ध गराउँछन् ।

यसले टोलीलाई ब्याटिङ र बलिङ दुवैतर्फ विकल्प दिएको छ ।

प्रतियोगिताको प्रारम्भिक सफलताका आधारमा लुम्बिनीले उपाधि जित्ने निष्कर्ष निकाल्नु हतार हुनेछ । लिग चरणका बाँकी खेल, प्लेअफको दबाब र विपक्षी टोलीको रणनीतिले यसको वास्तविक परीक्षा लिनेछन् । लुम्बिनीले आगामी खेलमा यही लय कायम राख्नुपर्नेछ ।

आज काठमाडौं गोर्खाजसँग हुने खेल टोलीका लागि अर्को महत्त्वपूर्ण चुनौती हो । काठमाडौँसँग डेभिड वार्नरजस्ता चर्चित खेलाडी छन् । यस्तो टोलीविरुद्ध लुम्बिनीले आफ्नो सामूहिक खेललाई निरन्तरता दिन सके त्यसले उपाधि रक्षा अभियानलाई थप बलियो बनाउनेछ । कप्तान करण केसी बल र ब्याट दुवैमा खतरनाक बन्न सक्छन् । दुवै टोली २ अंक जोड्ने ध्याउन्नमा हुनेछन् ।