युवाको हस्तक्षेपले सम्भव भयो राजनीतिक परिवर्तन : बाबुराम भट्टराई

नयाँ दिल्ली । नेपालका पूर्वप्रधानमन्त्री बाबुराम भट्टराईले युवाहरूको प्रत्यक्ष हस्तक्षेपका कारण नेपालमा महत्वपूर्ण राजनीतिक परिवर्तन सम्भव भएको बताएका छन्।

भारतको राजधानी नयाँ दिल्लीमा आयोजित डा. राममनोहर लोहिया स्मृति व्याख्यान कार्यक्रममा सम्बोधन गर्दै उनले गत सेप्टेम्बरमा देखिएको ‘जेनजी आन्दोलन’ले दुई ठूला दलहरूको गठबन्धन सरकार ढालेको दाबी गरे।

राममनोहर लोहियाको चर्चित भनाइ “जिन्दा कौमें ५ साल नहीं इंतजार करती” स्मरण गर्दै भट्टराईले सचेत नागरिक समाजले परिवर्तनका लागि लामो समय पर्खेर नबस्ने बताएका छन्।

उनका अनुसार, नेपालमा युवाहरूले भ्रष्टाचार, कुशासन र बढ्दो आर्थिक असमानताविरुद्ध सशक्त रूपमा आवाज उठाएका छन्। यही सक्रियताले राजनीतिक परिवर्तन सम्भव बनाएको उनको भनाइ छ।

भट्टराईले ३५ वर्षीय बालेन शाहको नेतृत्वमा नयाँ सरकार गठन हुनु तथा २६ वर्षीया रुबीकुमारी ठाकुर संसद्को उपसभामुखमा निर्वाचित हुनु ‘जेनजी’को उदयका महत्वपूर्ण संकेत भएको बताए।

उनले सन् २०१५ मा जारी भएको नेपालको संविधान २०१५पछि नेपाल नयाँ चरणमा प्रवेश गरेको उल्लेख गर्दै परम्परागत कांग्रेस र कम्युनिस्ट शक्तिभन्दा फरक वैकल्पिक राजनीतिक शक्ति निर्माणको आवश्यकता औँल्याए।

समाजभित्रका अन्तर्विरोधहरू क्रमशः ‘जेनजी आन्दोलन’का रूपमा विस्फोट भएको र त्यसले युवाहरूको नेतृत्वमा नयाँ राजनीतिक शक्ति सत्तामा ल्याएको उनले बताए।

भट्टराईले वर्तमान विश्व परिस्थितिमा बढ्दो द्वन्द्व र भूराजनीतिक तनावप्रति चिन्ता व्यक्त गर्दै विशेषगरी मध्यपूर्व क्षेत्रमा बढ्दो तनावका बीच एकताबद्ध भएर अघि बढ्नुपर्ने आवश्यकता पनि औँल्याए।