मकवानपुरमा लागुऔषधसहित १३ जना पक्रउ

मकवानपुर । मकवानपुर प्रहरीले जिल्लाका विभिन्न स्थानमा सञ्चालन गरेको चेकजाँचको क्रममा लागुऔषधसहित १३ जनालाई नियन्त्रणमा लिएको छ। जिल्ला प्रहरी कार्यालय मकवानपुरका अनुसार पक्राउ परेकाहरूको साथबाट प्रतिबन्धित लागुऔषध खैरोहेरोइनजस्तो देखिने पदार्थ, चरेस र गाँजा बरामद गरिएको छ।

प्रहरीले जेठ १४ गतेदेखि १७ गतेसम्म जिल्लाका विभिन्न स्थानमा शंकास्पद व्यक्तिमाथि चेकजाँचको क्रममा छुट्टाछुट्टै स्थानबाट खैरोहेरोइनजस्तो देखिने पदार्थ ३५ ग्राम १० मिलिग्राम, चरेसजस्तो देखिने पदार्थ २६० मिलिग्राम, गाँजा २३ ग्राम २१० मिलिग्राम र ट्रामाडोलका २ क्याप्सुल बरामद गरेको जनाएको छ। 

प्रहरीका अनुसार बारा जिल्लाको कलैया उपमहानगरपालिका–१४ का ३० वर्षीय राजन जैसवाल, निजगढ नगरपालिका–९ का २१ वर्षीय सर्जुक साह र रौतहटको बौधीमाई नगरपालिका–२ का २१ वर्षीय रोहित पटेलको साथबाट ३४ ग्राम ७९० मिलिग्राम खैरोहेरोइनजस्तो पदार्थ बरामद गरिएको छ।

त्यसैगरी, भारत घर भई हाल हेटौंडा उपमहानगरपालिका–४ बस्ने २३ वर्षीय आकाश कुमार, हेटौंडा–७ का २४ वर्षीय राज अधिकारी, हेटौंडा–११ का ३३ वर्षीय राजा बाबु शर्मा र बकैया गाउँपालिका–४ का ३४ वर्षीय समिर स्याङतानको साथबाट २१ ग्राम ३७० मिलिग्राम गाँजा र ट्रामाडोलका दुई क्याप्सुल फेला परेको प्रहरीले जनाएको छ।

यस्तै, हेटौंडा उपमहानगरपालिका–१ का ४४ वर्षीय सहदेव अर्जेल, ३० वर्षीय कालुराम गिरी, ३९ वर्षीय मनोज महर्जन र हेटौंडा–१७ का ३६ वर्षीय रामचन्द्र मोक्तानको साथबाट २२० मिलिग्राम खैरोहेरोइनजस्तो पदार्थ बरामद गरिएको छ।

त्यसैगरी,  हेटौंडा–८ की २३ वर्षीया अनुष्का क्षेत्री र भरतपुर महानगरपालिका–८ का २६ वर्षीय करण स्याङ्बोको साथबाट २६० मिलिग्राम चरेसजस्तो पदार्थ र १ ग्राम ८४० मिलिग्राम गाँजा बरामद भएको प्रहरीले जनाएको छ।

पक्राउ परेका १३ जना प्रहरीको नियन्त्रणमा रहेको र थप अनुसन्धान भइरहेको प्रहरीले जानाएका जनाएको छ।