चितवनमा दुई स्थानमा प्रहरीको छापा, जुवातास खेलिरहेका १३ जना पक्राउ

चितवन । चितवनमा जुवातास खेलिरहेको अवस्थामा प्रहरीले १३ जनालाई नगद र ताससहित पक्राउ गरेको छ। जिल्ला प्रहरी कार्यालय चितवन तथा मातहतका प्रहरी टोलीले जिल्लाका दुई छुट्टाछुट्टै स्थानमा छापा मारेर उनीहरूलाई नियन्त्रणमा लिएको हो।

मंगलबार जिल्ला प्रहरी कार्यालय चितवन र इलाका प्रहरी कार्यालय खैरहनीबाट खटिएको संयुक्त प्रहरी टोलीले खैरहनी नगरपालिका–८ पानीट्याङ्गीमा जुवातास खेलिरहेको अवस्थामा ८ जनालाई पक्राउ गरेको थियो।

प्रहरीले उनीहरूको साथबाट ७७ हजार ९ सय ९५ रुपैयाँ नगद र १० बुक तास बरामद गरेको जनाएको छ। पक्राउ परेका आठै जनामाथि जुवासम्बन्धी कसुरमा थप अनुसन्धान भइरहेको प्रहरीले जनाएको छ।

त्यस्तै, गएराति करिब १ बजे भरतपुर महानगरपालिका–१६ स्थित नवीन चोकमा जुवातास खेलिरहेको अवस्थामा थप पाँच जना पक्राउ परेका छन्।

जिल्ला प्रहरी कार्यालय चितवनबाट खटिएको टोलीले उनीहरूलाई नियन्त्रणमा लिने क्रममा ३३ हजार ९ सय ९० रुपैयाँ नगद र दुई बुक तास बरामद गरेको जिल्ला प्रहरी कार्यालय चितवनका सूचना अधिकारी डीएसपी चन्द्रभूषण यादवले जानकारी दिए।

दुवै स्थानबाट पक्राउ परेका १३ जनामाथि प्रहरीले थप अनुसन्धान गरिरहेको छ।