पात्रो
राशिफल
विदेशी विनिमय
सुन / चाँदी
युनिकोड
मौसम
शेयर बजार
nawayug.com
काठमाडौं । नेपाल आयल निगमले सामान्यतया प्रत्येक अङ्ग्रेजी महिनाको १ र १६ तारिखमा पेट्रोलियम पदार्थको नयाँ मूल्यसूची सार्वजनिक गर्ने गर्दछ। इन्डियन आयल कर्पोरेसन (आईओसी) बाट प्रत्येक महिनाको अन्तिम दिन र १५ तारिखमा नयाँ मूल्य प्राप्त हुने र सोही आधारमा निगमले मूल्य समायोजन गर्ने प्रचलन छ। तर, हिजो १ तारिखमा नयाँ मूल्य प्राप्त भए पनि निगमले हालसम्म नयाँ मूल्यसूची सार्वजनिक गरेको छैन।
निगमका प्रवक्ता मनोजकुमार ठाकुरका अनुसार हिजो प्राप्त नयाँ मूल्यमा ठूलो परिवर्तन भएकाले सञ्चालक समितिको बैठक बसेर निर्णय भएपछि मात्र नयाँ मूल्यसूची सार्वजनिक गरिनेछ।
निगम स्रोतका अनुसार यसपटक भारतबाट पेट्रोलियम पदार्थको मूल्य दोहोरो अंकले बढेर आएको छ ।
‘अन्तर्राष्ट्रिय बजारमा कच्चा तेलको मूल्य बढेकाले आईओसीबाट प्राप्त नयाँ मूल्यसूचीमा पनि मूल्य वृद्धि देखिएको छ,’ स्रोतले भन्यो, ‘शनिबार र आइतबारको बिदाले सञ्चालक समितिको बैठक बस्न ढिलाइ भएको हो । बैठकले निर्णय गरेपछि मात्र नयाँ मूल्य कार्यान्वयनमा आउनेछ ।’
भारतबाट मूल्य बढेर आएका कारण नेपालमा पनि पेट्रोलियम पदार्थको मूल्य बढ्ने निश्चित देखिएको छ, तर निगमले कहिलेसम्म नयाँ मूल्य सार्वजनिक गर्छ भन्ने अझै स्पष्ट भइसकेको छैन ।
