बागमतीका तीन मन्त्रीको पद रिक्त गर्न लिङदेनद्वारा प्रदेश सभा र निर्वाचन आयोगलाई पत्र

काठमाडौं । राष्ट्रिय प्रजातन्त्र पार्टी (राप्रपा) ले बाग्मती प्रदेश सरकारमा सहभागी भएका आफ्नो पार्टीका तीन मन्त्रीलाई पदमुक्त गर्न सिफारिस गरेको छ । पार्टी अध्यक्ष राजेन्द्र लिङदेनले यस विषयमा निर्वाचन आयोग र बाग्मती प्रदेशसभा सचिवालयलाई पत्राचार गरेको महामन्त्री राजेन्द्र गुरुङले जानकारी दिए ।

केन्द्रको निर्णय र निर्देशन विपरित बाग्मती प्रदेश सरकारमा राप्रपा सहभागी भएको थियो । बाग्मती संसदीय दलका नेता उद्धव थापाले एमाले नेतृत्वको सरकारलाई समर्थन जनाएपश्चात् पार्टीले उनलाई कारबाही गरिसकेको छ । यस्तै, सरकारमा मन्त्री बनेका राजु विष्ट, राजेन्द्र प्रजापति र गिर बहादुर तामाङलाई अनुशासन आयोगले स्पष्टीकरण सोधेको थियो । उनीहरूले स्पष्टीकरणको जवाफ दिएनन् ।

जवाफ नआएपछि अध्यक्ष लिङदेनले आज तीनैजनालाई सांसद र मन्त्रीबाट पदमुक्त गर्न पत्र पठाएका हुन् । उनीहरूलाई थप कारबाहीको निर्णय लिन अनुशासन आयोगको बैठक बसिरहेको छ । बैठकले उनीहरूको पार्टी सदस्यता पनि निलम्बन गर्न सक्ने सम्भावना रहेको छ ।

बाग्मती प्रदेशमा आज मुख्यमन्त्री किरण थापाले विश्वासको मत माग्दैछन् । उनको सरकार जोगाउन राप्रपा निर्णायक देखिन्छ । राप्रपाका दुई जनाले मात्रै समर्थन गरे पनि सरकार सुरक्षित रहनेछ । राप्रपाका दुई सचेतकले विश्वासको मतको पक्षमा र विपक्षमा मत हाल्न बेग्लाबेग्लै ह्वीप जारी गरेका छन् ।