हिजो घटेको शेयर बजार आज सामान्य बढ्यो,१ महिनापछि ६ अर्ब रुपैयाँको कारोबार

काठमाण्डौं । हिजो घटेको शेयर बजार आज सामान्य बढेको छ । शेयर बजार परिसूचक नेप्से ४ दशमलव ९९ अङ्कले बढेर २ हजार ७८२ दशमलव १० विन्दुमा पुगेको छ ।

आज फाइनान्स, होटल तथा पर्यटन, उत्पादन तथा प्रशोधन र अन्य बाहेक सबै समूहका सूचक सामान्य बढेका छन् । आज १५१ वटा कम्पनीका शेयर बढेकामा १०५ वटाको घटेका छन् । यस्तै १४ वटा कम्पनीका शेयर घटबढ भएका छैनन् ।

आज कालिञ्चोक हाइड्रोपावरको शेयर १५ प्रतिशत, बुङ्गल हाइड्रोको शेयर १४ दशमलव ८८ प्रतिशतले बढेको छ । बजार सामान्य बढेको दिन सानिमा बैंकको डिबेन्चर साढे ६ प्रतिशतभन्दा धेरैले घटेको छ ।

आज नेप्सेसँगै कारोबार रकम पनि बढेको छ । हिजो ४ अर्ब ८५ करोडको कारोबार भएकोमा आज ३५४ वटा कम्पनीका १ करोड ५२ लाख कित्ता शेयर ६ अर्ब ३ करोड रुपैयाँमा किनबेच भएको छ ।

यो कारोबार रकम झन्डै १ महिनायताकै धेरै हो । यसअघि गएको वैशाख १५ गते ६ अर्ब ५३ करोड रुपैयाँको शेयर किनबेच भएको थियो । त्यसयता कारोबार रकम ६ अर्ब पुग्न सकेको थिएन ।