‘नेपाल खुला छ’ सन्देशसहित विश्व पर्यटन दिवस मनाउँदै नाट्टा

काठमाडौं । नेपाल एशोसिएसन अफ टुर एण्ड ट्राभल एजेन्ट्स (नाट्टा)ले विश्व पर्यटन दिवस २०२६ को अवसरमा दुई दिने विशेष कार्यक्रम आयोजना गरेको छ। आजदेखि ‘नेपाल बोलाउँदै छ’ र ‘नेपाल खुला छ’ अभियानअन्तर्गत कार्यक्रम सुरु गरेको हो।

अभियानमार्फत नेपाल सुरक्षित, सञ्चालनयोग्य र विदेशी पर्यटकका लागि खुला रहेको सन्देश प्रवाह गरिने नाट्टाले जनाएको छ ।

अभियानको पहिलो दिन आज बिहान ‘नाट्टा स्वच्छ तथा हरियाली अभियान’ सञ्चालन भएको छ। शिवपुरी–नागार्जुन राष्ट्रिय निकुञ्ज करिडोरअन्तर्गत बुढानीलकण्ठ–टोखा–चण्डेश्वरी क्षेत्रमा सरसफाइ गरिएको नाट्टाका महासचिव राजकुमार देवकोटाले बताए।

दोस्रो दिन आइतबार बिहान ७ बजे ‘नेपाल बोलाउँदै छ–नाट्टा सम्पदा दौड’ आयोजना हुनेछ । काठमाडौंको वसन्तपुर दरबार क्षेत्रबाट सुरु हुने करिब ६ किलोमिटर दौड पाटन दरबार क्षेत्रमा पुगेर सम्पन्न हुनेछ ।

दौडमा पर्यटन व्यवसायी, पर्यटनसम्बद्ध सङ्घसंस्था, युवा तथा सर्वसाधारणको सहभागिता रहने उनले बताए । अभियानले नेपालको सम्पदा, संस्कृति, वातावरण र पर्यटनलाई जोड्दै नेपाल पर्यटनका लागि खुला रहेको सन्देश दिने उनको भनाइ छ ।

नाट्टाले दुवै कार्यक्रमलाई विश्व पर्यटन दिवसको सन्दर्भमा नेपालका सम्पदा, संस्कृति, वातावरण र पर्यटन व्यवसायबीचको सम्बन्धलाई थप सुदृढ गर्ने अवसरका रूपमा लिएको जनाएको छ ।