‘क्रान्ति पूरा गर्न पुनः अध्यक्षमा–बिजुक्छे

भक्तपुर। नेपाल मजदूर किसान पार्टीका अध्यक्ष नारायणमान बिजुक्छेले क्रान्ति पूरा गर्न पार्टीले आफूलाई पुनः अध्यक्षको जिम्मेवारी दिएको बताउनुभएको छ । कमलविनायकस्थित आफ्नै निवासमा आज आयोजित पत्रकार सम्मेलनमा उहाँले आफू पार्टीको कार्यकर्ता मात्रै भएको र सातौंँ महाधिवेशनले आफूलाई पुनः जिम्मेवारी दिएको बताउनुभयो ।

पत्रकार सम्मेलनमा अध्यक्ष बिजुक्छेले भन्नुभयो, “हामी पार्टीका कार्यकर्ता हौँ, पार्टीले जे जिम्मेवारी दियो, त्यही जिम्मेवारी लिने हो, देशमा अझै समाजवाद ल्याउन बाँकी छ, माक्र्सवादको त्यही क्रान्ति पूरा गर्न पार्टीले मलाई पुनः अध्यक्षको जिम्मेवारी दियो ।”

देशमा समाजवाद र साम्यवादी व्यवस्था नआएसम्म क्रान्ति जारी रहने बताउँदै बिजुक्छेले बन्दुक बोकेर क्रान्ति नआउने र बन्दुक बोकेकै भरमा कोही पनि कम्युनिष्ट नहुने बताउनुभयो । बिजुक्छेले भन्नुभयो, “बन्दुक बोकेकै भरमा माओवादीलाई कम्युनिष्ट भन्न सकिन्न, बन्दुक बोक्ने सबै कम्युनिष्ट हुने भए नेपाली काङ्ग्रेस २००७ सालमा कम्युनिष्ट भइसक्थ्यो, पृथ्वीनारायण शाहदेखि राणासमेत उहिल्यै कम्युनिष्ट भइसक्थे ।” महाधिवेशनले सबै जातजाति, एवं भाषाभाषी र भूगोललाई समेटेर केन्द्रीय समिति गठन गरेको उहाँको भनाइ थियो ।

प्रदेश संयोजक तोकियो
महाधिवेशनबाट निर्वाचित केन्द्रीय समितिको आजको पहिलो बैठकले पार्टी सचिवमा प्रेम सुवाल र कोषाध्यक्षमा मोहनप्रसाद प्रजापति चयन गरेको छ । २५ सदस्यीय केन्द्रीय समिति निर्वाचित भएकोमा आजको बैठकले रवीन्द्र ज्याख्वालाई केन्द्रीय सदस्यमा एवं राजेन्द्र चवाल र नारायणबहादुर दुवाललाई वैकल्पिक केन्द्रीय सदस्यमा मनोनित गरी २८ सदस्यीय केन्द्रीय समिति विस्तार गरेको छ ।

त्यसैगरी आजको बैठकले केन्द्रीय सदस्यमध्ये प्रदेश नं १ मा उकेश कवाँ, प्रदेश नं २ मा सुरेन्द्रराज गोसाईं, प्रदेश नं ३ मा प्रेम सुवाल, गण्डकी प्रदेशमा डिल्लीप्रसाद काफ्ले, प्रदेश नं ५ मा हरिसुन्दर बासी, कर्णाली प्रदेशमा सरोजराज गोसार्इं र सुदूरपश्चिम प्रदेशमा नन्दबहादुर शाहीलाई प्रदेश संयोजक चयन गरेको छ । रासस